غني والاّ فقير

.

الدني صغيرة كتير والناس عم يصغروا أكتر واكتر
ما عم لاقي حدا بيستاهل يعيش بهالدني.. الفقرا هون بكرا بيغنو بهديك الدني، والأغنيا هون رح يفقرو
بتمشي عالطريق بتلاقي ولاد مبهدلين، ختياريي منسيين..
ناس عم تشتري ساعات بألوف الدولارات وناس عم تشحد من الوقت إيد تساعد وحضن يضم
بيقرب العيد كل سنة وبيبعد الفرح كل سنة
كنا ولاد كنا نحلم بالعيد.. بالشجر المزينة والفرص البتبعدنا عن الكتب وبتعطينا ضحكة ما بتخلص..
كنا ننطر بوسة إمي توعينا الصبح لنقوم نفتح هدية العيد .. هدية وحدة مش محل اللعب كلو..

..
كنا صغار وكبرنا..
كانوا الولاد ولاد وما في شي بيفرقون عن بعض ..
حتى منطق الغنى والفقر النتقل للولاد .. صار في ولاد ناطرة تتدفى بأضوية الشجر عالطرقات.. وولاد بتتباهي مين شجرتو أكبر وأحلى
كان عنا حلم.. بتتذكروا قديش كنا نحلم؟

..
تخايلو جيل مقسوم فئتين:
قسم بيحلم برغيف الخبز وبسقف يلمو
وقسم بيلعب بياكل وبينام .. مش عايز يفكر ولا ناقصو شي ليحلم
كان يغمرني فرح كبير قبل العيد.. حمدالله بعدني بحتفل بالعيد أنا وعيلتي متل قبل " امي وبيي واخواتي" وبعدو العيد عندو نكهة خاصة مع ان الأحوال ضيقة..
بس بالرغم من الجهد اللي بعملو تيحافظ عنا العيد عنكهتو الحلوة في حزن بيتحكم بقلبي كل مرة بكون مارقة عالطريق..
-اذا الدني عم تشتي بصير فكر إنو أنا معي سيارة بس هالمعترين رح يمرضو تحت الشتي،
- بوقف حيراني شو بدي نقي تيابي اليوم بالوقت اللي في كتير ناس ما عندا خيار تغير تيابا ولا تتحمم لتصير نظيفة،
- بنقي شو بدي اطبخ شو الترويقة وشو الغدا وإذا كنت آكلة كتير بالنهار بقرر ما إتعشا..

عم تتخايلو نحن منقرر ما ناكل بالوقت الي في ناس ما عندون ياكلو ولا بيقدرو ينقو شو بدون ياكلو.. بياكلو المتوفر عندون..

..
يسوع لما كان عم يحكي الناس الفقرا قالولو تلاميذ: عتمت الدني خلي هالناس يفلو ما عنا نطعميون، كتّر الخبز والسمك وقال لتلاميذو: "هيدا خبز وهيدا سمك طعمو الناس الجوعانين"..

..
صار في كتير ناس جوعانة.. كيف منطعميون يا رب.. نحن مش متلك ..
منخاف نجوع منخبي المصاري ومنخزن اكل ببيوتنا لولادنا ومنمحي من فكرنا كل الناس الداشرة عالطرقات..
منلبس ومنشتري تياب ومنتباهى كل شهر بتياب جديدة وفي ناس عم تموت من الصقعة لأن تيابا تخزقت وما عندا غيرا
نحن منشتغل منقبض مصاري منروح ومنجي.. في ولاد شغلون يفتشو عن لقمة خبز او لمسة عطف وحنان..

...
شو منعمل يا رب؟ كيف منعيش بلا ما نساعد واذا ساعدنا اليوم رح نقدر نساعد بكرا؟
صارو مليار انسان جائع بالعالم.. مليار طالبين رحمتك يا رب.. انت اكيد بتقدر..
هودي ولادك يا رب.. شوف شو بدّك تعمل فيون
نحن قوايا منتخلى عن الضعيف.. الضعيف بيأخرنا وبياخدلنا وقتنا
انت عندك كل الوقت لولادك.. وقادر تخلق قوة من العدم وتعطي بيت للي ما عندو وخبز للجوعان..
نحن مش فاضيين عنا شغل كتير وملهيين باشيا اهم من الرحمة والمحبة.. انت وقتك إلك فيك تغرف رحمة ومحبة وتوزع عليون..
أنانيتنا بتمنعنا يا رب، بيمنعنا خوفنا من ان نصير ضعاف ..
ما منحبون لأنا منحب ولادنا.. منخاف حبنا للفقرا ياخود شي من طريق ولادنا
الفقرا ولادك ونحن ولادك.. نحن عطيتنا القوة والفرص لنكون احسن وهني خلقتون لتجرب محبتنا الك فيون.. هني على صورتك ومثالك ونحن ما عم نقشعك غير بالمراية، مننسى انو انت هني وان كل ما بيطلع فينا فقير بتكون انت عم تشوفنا، وأن كل ما بيبرد مشرد انت بتبرد ونحن دفيانين..

..
بتعرف يا رب.. الهيئة نحن الضعاف وهني القوايا..
هني ضعاف هون، بس قوايا فيك.. قلبون مليان فيك وبمحبتك.. صحيح فقرا بس بكرا بيغتنو فيك.
نحن قوايا هون بس قلبنا فاضي وبعاد عنك.. بكرا بس تخلص الدني منصير نحن الفقرا وبيصيرو هني الورثة لمملكتك وبيبقوا معك لأن أنت وحدَك الفرح الحقيقي..

....

....

تسلم يا عسكر لبنان

شو هالإيام اللي وصولنالا

..

بيقولولك من عرق جبينو

طلّع مصاري هالإنسان
طيب كيف هيدا و كيف ملايينو
و لا مره شايفينو عرقان

....

...

كل الإحتمالات واردة

.
إيام بتكون بين اصحابك أو اهلك وبتبقى مرتاح ومبسوط
وإيام بتكون بين الناس وبتحس الدني فاضية وانتَ لوحدك

وايام بتبقى مطوووش من العجقة وعبالك تكون لحالك
وايام بتخنقك الوحدة وبتصير تفتش عمين يكون معك

ايام بتحلم أن عندك قصر وسيارات وشبيك لبيك عبدَك بين ايديك
وايام بتقول حمدالله عهالنعمة بفضل كون عقد حالي ولا كون مرتاح ما بسأل عن غيري

ايام بتكون عم تحضر شي فيلم أو مسلسل بتتمنى تكون واحد من هالشخصيات وتترك حياتك وناسك
وايام بتشكر ربك أنو منّك ولا شخصية من هالشخصيات وان ربنا نَعَم عليك وخلقك محل ما إنت

ايام بتجي الإيام وبتروح وانتَ ولا داري وكانك مش حاسس بالوقت
وايام بتكون ناطر حدا ما بيعود يخلص الوقت

غريب الإنسان
غريب قديش مزاجيتو وأهواؤه بتتحكم بحياتو
غريبة الدني
كيف فيا تشتي وتشمّس عسقف واحد
أنا مثلاً صارلي فترة مش عم بقدر أقفر إحساسي
ولا عم بقدر أعرف شو بدّي
بس الأكيد أنو كل الإحتمالات عندي واردة

...

Saber Rebai - Ala nar

Saber Rebai - Ala nar
Uploaded by ihyana. - See the latest featured music videos.

Saint of "IMPOSSIBLE and LOST CAUSES"

Saint Rita, known as the patron/saint of "IMPOSSIBLE and LOST CAUSES."


I walked from my home to this Holly place, I Light a candle for you and I prayed (el Massbaha killa)

Someone told me that my name means the “Inner Peace” and girls who have that name must be able in any situation to find the inner peace, and be strong to overcome the difficulties..

If you believe, you can find your inner peace to face this awful situation..

I trust that this situation will pass and it won’t last forever, GOD will surly help you in his own way.

...

"اشتقتللك"

..

تسلملى اشتقتلك بغيابك فى شو صار

سامحنى قلتلك انا عشت النار

انت وبعيد انا ببقى وحيد و عم عد دقايق بعدك عنى ليلى نهار

على نار عم يخلص قلبى بغيابك

على نار مشتاق لعطرك لتيابك

على نار ياحبيبى عليك من خيالك شو بغار

نورنى دفينى داويلى قلبى اللى داب

ريحنى نسينى لون العذاب

انت ومش هون بيضيع اللون

وبشوف الشمس عم تشرق متل غياب

على نار عم يخلص قلبى بغيابك

على نار مشتاق لعطرك لتيابك

على نار ياحبيبى عليك من خيالك شو بغار

...

ماتطوّل الغيبة

...

أحلا أيار

...

....

كل سنة إلي موعد مع شهر أيار

والسنة كمان قررت إمشي على حريصا باول أيار

وأكيد النزلة على حريصا من اجمل المشاوير يلي بيقطعوا عليي بالسنة

.

السنة غير عن كل سنة قررت إنزل مشي وإرجع مشي

وبمشواري صورت وتخايلت لبنان اللي بحبو، ولقيتو بعدو موجود عطرقات البتودي عحريصا

.

حفافي العنب والتين

بواب العتيقة

دراج العمروها جدود جدودنا

زهّر الياسمين والفل والزنبق وبخور مريم

وهيدا بيتك يا ستي الختيارة بيذكرني ببيت ستي

عتق الباب وهالحيطان

جلال الزيتون

وغابات الصنوبر

وارز لبنان الما بيغيب عن كل المناطق

البيوت القديمة

تراثنا وتاريخنا

التقيت بطريقي ختيار عم يمشي متلنا بأول أيار

أرزنا العلي

حتى البيوت الجديدة لبست شكل وذكريات الماضي

صليت من كل قلبي بهالمشوار

وأنا وراجعة بيدق تلفوني

وبيوصلّي خبر صارلي زمان ناطرتو وما كان ممكن يوصل بنهار متل هالنهار

بس العدرا كانت عم تقلي: خلي إيمانك كبير

يمكن هيدا كان من أجمل االإيام اللي مرقوا عليي من فترة طويلة

........

كوني إنتِ وانتخبي

.
رح إنشر تعليقي على مدونة عربية حول موضوع هالإعلان.. رأيي ذكرتو عالمدونة يلي بحترم صاحبتا كتير، عكل حال حبيت أعرض رايي عن هالموضوع هيك كان تعليقي:

.
بتعرفي إنو أنا شخص كتير موضوعي
كرمال هيك رح إسألك، شفتي الفيلم المرتبط بالدعاية يلي عم ينعرض عالتلفزيون؟
لما بدون يكسروا هالشعار البشع عن المرأة كان بينعمل أكتر من شغلة
أولاً بينقال :"كوني ذكية وصوّتي"
ثانياً: أكيد الفيلم يلي بتبين في هالبنت بتيابا الداخلية، ما كان لازم ينعمل.. كان لازم يصورو بنت عم تدرس بالجامعة، رايحة عشغلا.. عم تعيش حياة طبيعية وبعدين بتروح تنتخب
ثالثاً: ما بنقوا بنت لتعرض وجّا وجسما.
أنا لا مع 8 ولا مع 14 ، بس أنا حسيت أنو هيدا الإعلان هانني كبنت مثقفة وما بقبل صوت لمرشح عم يستعملني سلعة متلو متل حيلا شركة تجارية بدا تسوق مبيعاتا من خلال عرض جسم المرأة.
.
بدي ضيف على هالتعليق إن ويمكن إحتراماً للمرأة اللبنانية المثقفة ويلي مفروض يتوجه لإلا نفس الإعلان بكا المناطق دون تمييز بين مناطق شيعيّة ومسيحية كان لازم يكون هالشعار "كوني إنت وانتخبي"، النتخبي يلي بيحترمِك متل ما إنتِ يلي بيحتر لبنانيتِك، ثقافتك، تحررك، ارتباطك بالعيلة، احترامك للقيم اللبنانية،
كوني البنت يلي قادرة تشكل علامة فارقة بمجتمعنا وانتخبي يلي بيحترمك متل ما إنتِ، كوني الإم والإخت والحبيبة يلي بيفتخر كل نايب إنو تعطي صوتك..
هيدا هوي الإعلان يلي بحلم شوفو بلبنان
بس للأسف العقل اللبناني المريض بدو ياني انتخب ناس ما بيعرفوا إنو المرأة اللبنانية قادرة تحكم وتعبر عن رأيا وتثبت حالا عقد الرجل..
عكل حال أنا كفتاة مثقفة وشايفة حالا قد كل شي في سياسي بهالبلد وأكتر منون كمان.. ما بيشرّفني أعطي صوتي لولا واحد من هالقطيع الي مرشح.. لأن ولا واحد منون قنعني إنو مرشح للبنان مش للكرسي..

ولا واحد قنعني إنو مرشح للفقرا.. للشباب العم يهاجروا.. للبنان العم يحترق..

.

إذا أنا غلطاني حدا منكون يقنعني بالعكس..

.

حلم..وبيت

.

من زمان من شي 6 سنين أو أكتر شوي وقفتني الحياة قدام استحقاق قوي وما كنت عارفي شو بدي أعمل أو كيف آخد قرار وخلال هالسنين قطعت بمراحل صعبة كانوا أشبه بمهمة مستحيلة
ما فيي إكتب التفاصيل بس رح جرب شبّه هالفترة اللي مرقت، ببيت من قش..
كأن كأن حدا بنالي بيت من قش وسكنني فيه وقالي:
"بدك تحمي هالبيت وما تخلي يوقع، جربي عقد ما بتقدري تحميه من كل شي وبعد فترة هالبيت بيصير قصر وبيكون ملكك لأنّك قدرتي تخليه لا يوقع من كتر ضعفو ولا يطير بوج الريح ولا يزحل مع كل شتوة.."
من وقتا وأنا مهدّاية القشّات برموش عيوني، تِلفوا إيديي وتعبوا عيوني.. يعني ولوّشت متل ما بيقولو..
يمكن هيدا القصر الموعودة فيه، ما يكون حلو عقد ما أنا متخايلتوا، ويمكن بيت القش بس يتحول لقصر اشتقلوا وبطّل قادرة استبدلو بالقصر، ويمكن يلي كلّفني بهالمهمة كان فكرو إنو بس إحمي بيت القش كل هالمدة يصير قصر بنظري وما يعود بدّي غيرو..
إيّام بحس إنو ما بقى بدي لا البيت ولا حتى القصر وخلي هالقشّات يرتاحوا وتاكلون العاصفة..
وإيام بقول ما بقى محرزي كل هالنطرة وكل هالتعب معقول استسلم هلّق.. بركي طلع هالقصر عمستوى أحلامي وطموحي..
يمكن هالمهمة اختارتني لأني بحمل وقادرة احمي هالبيت..
ويمكن لأني كنت عايزة البيت تيصير عندي حلم وتإقدر حققو..
بس أكيد لو كنت عارفي قديش صعب وقديش متعب وبدو وقت هالبيت يمكن ما كنت قبلت إحلم.

.

إذا بدي اعمل تقييم نفسي لحالتي بهالوقت
بيطلع معي إني بمرحلة إنعدام الإحساس
بعرف شو يلي وصّلني لهالحالة
وبما أنو الحل مش بإيدي
صرت بهالوضع النفسي المتأزم
حاسي كان بدي إقبع راسي من محلّو وكبّو بالبحر
أو بركي بدي شيل دماغي وطعمي لسمك البحر
بدي حكّ جلدي حتى يطلع منو الدمي
والأسوأ من هيك إنو ما بدي إحكي بالمرة عن الموضوع يلي وصلّني لهالحالة
لأن أكيد رح إنفجر ورح تكون النتايج وخيمة.

نعظّمك باستحقاق يا معطي الحياة

...

The Prayer

"Andrea Bocelli-Celine Dion"

...

I pray you'll be our eyes

And watch us where we go
And help us to be wise

In times when we don't know
..

Let this be our prayer

When we lose our way
Lead us to the place..

Guide us with your grace..
To a place where we'll be safe
...

La luce che tu hai
I pray we'll find your light
Nel cuore resterà
And hold it in our hearts
A ricordarci che
When stars go out each night
Eterna stella sei
Nella mia preghiera
Let this be our prayer
Quanta fede c'è

..
When shadows fill our day
Lead us to a place..

Guide us with your grace..
Give us faith so we'll be safe
...
Sogniamo un mondo senza più violenza
Un mondo di giustizia e di speranza
Ognuno lo dia la mano al suo vicino
Simbolo di pace, di fraternità
La forza che ci dà
...
We ask that life be kind
È il desiderio che
And watch us from above
Ognuno trovi amor
We hope each soul will find
Intorno e dentro sé
Another soul to love

..
Let this be our prayer

Just like every child
Need to find a place

Guide us with your grace..
Give us faith so we'll be safe
...
È la fede che
Hai acceso in noi,
Sento che ci salverà

...

إلى منصور.. إلى الأخوين رحباني

.
يوم اللي غاب منصور الرحباني جربت إكتب عن إنسان كنت إعتبرو فوق العادة.. أو يمكن جربت اكتبلو .. خاصة" إنو بعد رحيلو صار شقفة من حقيقة كان كل عمرو عم بيفتّش عنّا..
كيف بدي عبّر عن حزني فقدان إنسان كان مش متل كل الناس.. إنسان رسم صورة للبنان بقلبي وخلاه يكون وطن مغيّر عن كل الأوطان..
لبنان أخضر حلو.. لبنان بلد العيد..
أنا من الأشخاص يلي كتير تأثروا بأعمال الرحابنة.. وشافوا لبنان بكلماتون ولحنون وبصوت فيروز..
حبيت فيون عشقون للهجة اللبنانية يلي انحفرت بدمي وبكتاباتي.. وبصوري ومشاعري..
حبيت بمدرسة الرحابنة إنا كرّست كل وقتا لتبني حلم إسمو لبنان.. لهجتو فريدة من نوعا، إيمانو مميّز، وهويتو أكبر وأعظم وأهم من إن تشبه هويّة تانية..
بالوقت يلي العالم كلو بيفتّش عن العظمة والفخفخة.. إجو هني ليحكو ببساطة عن شجر اللوز، عن حجل صنين، عن حجار الحفافي، عن مفرق الوادي، عن ورق الخريف وكروم العنب.. حكيوا عن أرضنا عن هوانا عن ضيعنا عن تلاتنا الحلوة عن جبال التلج ونور القمر الي بيطلع، البواب العتيقة وصوت النهورا، عن الصفورة البدا تعشش بالقرميد، عن السوسنة، عن السماق ...

حكيو عن الناس بأسامي الناس، يوسف الكندرجي، صبحي بيّاع اللوز، أمين البواب، راجح، هيفا، وردة، بو ديب، نصري، زيون... وستي المن كحلون وبيت الختيارة الي بيشبه بيوت جدودنا
مفردات الأغاني كانت مليانة بمفردات الضيعة والجبل والوطن والحلم اللبناني... هيدا الوطن يلي بخاف أوعا شي يوم وإخسرو.. هالوطن يلي بخاف ما يعرفو ولادي ويبقى خبرية خبّرون ياها قبل ما يناموا..
صور ذكريات وحكايات.. حكيوا بمسرحياتون وأغانيون لتضل بقلوبنا وما تصير منسيّة.. لما عبدو كان بدو يكب حالو عن سطح البلدية كرمال وردة... ولما حنّة وقفت بين نصري وأبي صالح لتبوسون وتصالحون، ووقت البو ديب كمش التمساح والسبع القد الضبع وخبر هيفا عن الصيد وحكايات الصيد.. والإسوارة الي ناطرة إيد صبية حلوة تلبسا.. وغيرا وغيرا من السهرات والحكايات والقصص يلي نقلت طبيعة الحياة بالضيعة..
خبرنا عن مجتمعنا وضيعنا وخلافاتنا.. وصالحنا بمسرحياتو بكلمة ببسمة بدمعة ولفتة زغيرة
حكي عن سخافات حكامنا ومفهومون الغلط للسلطة السياسية وللحكم، حكي عن الحاكم الصالح الي لازم يسهر على رعيتو، حكي عن بترا يلي ضحت ببنتا ليبقى الوطن..
بعدني بذكر لما سمعت انا وزغيرة غنيّة.. "إمي نامت عبكير وسكّر بيي البوابة وانا هربت من الشباك وجيت لعيد العزّابي"، كنت فكّر إنو عيد العزّابي بيضل ناطرني تإكبر وإهرب من الشباك، لدرجة كنت إتصور البرداية عم تلوح بغيابي..
كيف مننسى اللي كتب وطني "يا بلد الغيم الأزرق، يا تراب البيحبونا، يا بيوت الي سبقونا.. بشجر أراضيك سواعد أهلي تكسّروا وحجار حفافيك جدود جدودي لعمروك.. وطني عم إكبر وتكبر بقلبي".. يللي قال خدني عالأرض يلي ربتنا.. انساني على حفافي العنب والتين.. إركع تحت أحلا سما وصلي

هالإنسان يلي كبّر الوطن بقلوبنا تصار الوطن عوسع المدى والفكر والحلم.. ما بقدر شوف لبنان متل ما أنا بحبو بدون الرحابني.. راحو وطبعو مجتمع بكاملو بحلم، بهدية للأجيال الجايي..
الرحابني خلوا لبنان مرجع للفن اللبناني المتميّز بين مدارس كانت عم تطغى بقوة على المجتمع العربي.. خلقوا هويّة للفن بتشبه وطنا وعاداتنا وتقاليدنا
ما رح إقدر إحكي عن يلي كتب صيف 840 ، هالة والملك، فخر الدين، ميس الريم، جبال الصوان، لولو، ناطورة المفاتيح.. وغيرون.. عن يلي صرخ: لا تخافو ما في حبوس تساع كل الناس‏‏.. كيف بدي عبر عن يلي خلق من الحلم وطن..
إذا نحن ما حكينا تراب الوطن بيحكي، جبالنا بتبكي، وهوا بيروت بيبقى يخبر عن يلي راح وكتب تاريخ جديد لوطن ما بينمحى..

...

ما تذكر

...